2009.05.23 星街: 關淑怡不嫁孩子的爸

[蘋果日報]

柴九話齋，人生有幾多個十年。關淑怡過了四個十年，做過樂壇天后又做過未婚媽媽。當下，囝囝都 7歲了，為生活為事業乜都好，關淑怡那怕豁出去，不變的是依然剛愎，不要阿仔經手人照顧，不要他一分一毫，縱使他要求組織家庭，她也繾綣無名份的愛，這位 21世紀單親媽咪選擇單人匹馬兩脇插刀保護兒子，還有竭力保護「他」。　撰文：朱倬誼

過去 10多年，關淑怡由九十年代樂壇天后變成未婚媽媽， 05年她復出時承認未婚產子，此後謠言滿天飛，先後傳過其子賢仔的父親是華僑、喇嘛及曾志偉。這天關淑怡在中環接受訪問，提起志偉疑似阿仔老竇隨即嗌救命，苦笑說：「志偉係我世叔伯，冇可能，我覺得好慘，救命呀！佢邊有見過我個仔呀？」
傳志偉是孩子經手人，原因是賢仔被指貌似志偉，其次是有指志偉對她母子很照顧，關淑怡卻說：「佢對個個都照顧㗎，志偉仲話有冇搞錯，傳我同你？我點出嚟見人呀？我話 uncle，傳我同你，家係我唔使結婚！我先唔使出嚟見人呀！」

拒索取金錢

另一傳聞是賢仔父親是宗教界人士，關淑怡卻模稜兩可說：「佢有冇宗教我唔知。」至於兩人有沒有聯絡，她說：「少啦，佢應該都有佢嘅忙。」對方有否提出過組織家庭？關淑怡說：「都有，不過係我唔得，我唔係太適合結婚嘅人，我太需要私人空間，鍾意攤吓 hea吓，結咗婚冇咁 free，或者我未 ready，寧願做 single mother。」
關淑怡直言他在生活上從沒照顧過她，她說：「因為我唔係呢種人，我唔會要求亦唔會畀機會佢提出。」一毫子都冇要過？她說：「我靠我自己！」他是孩子的爸，天經地義背負養兒責任，偏偏她拒人千里，說道：「可能我性格問題，唔想自己個仔女只注重爹哋媽咪係啲乜嘢人，想佢知道自己嘅價值、知道呢一刻我係 single mother，我做媽咪嘅係會保護佢。」
關淑怡做單親媽媽有自己的看法，但對缺乏完整家庭的囝囝來說未必公平，她則說：「要組織家庭唔係諗或者講咁簡單，兩個人真心相愛唔一定要結婚。如果大家尊重個小朋友，就唔應該擺志偉上枱，老竇係冇得作㗎，但佢從來冇問過，如果佢問，我唔會隱瞞。況且拍唔拍拖、結唔結婚，都係我私人事，我唔需要同人交代。」問關淑怡，你還愛他嗎？她想一想，徐徐說：「我唔可以話唔愛，變成……好難形容，總之感覺係唔一樣。」
有子萬事足

7年來，關淑怡不遺餘力把他的身份埋藏，她說：「都過去咗，仔都 7歲，不足掛齒啦。」她似乎要把保護他的責任扛上身，她也說：「講真，我有內疚感，我係公眾人物，有啲嘢好難避免記者會問，我身邊嘅人會好慘。」
關淑怡說兒子的性格像她，才 7歲已需要私人空間：「平時我哋會打 PSP，佢仲話乜你咁蠢㗎媽咪。我會送佢返學放學，星期六日盡量陪佢。飲吓茶我最鍾意㗎啦，佢同我好似，話媽咪你去飲你嘅茶，我去搵我嘅朋友，佢又好要自己空間。佢畫畫好叻，日日都送一幅畫畀我嘅。其實佢好懂事，獨立性高，叻我好多，好識講嘢，仲好識人開心。我家對住個仔有得攬就攬，有得錫就錫，唔係大個嘅時候：『阿媽我要坐你大髀』，唔知點啦，到時佢仲大隻過我呀。」

我行我素尋開心

再戰樂壇，關淑怡的成績表與當紅期難免有距離，倒是她看得開，還哈哈大笑：「即係話我唔夠紅啦？哈哈！以前還以前，我都想擺低以前嘅嘢。家會覺得歌手冇咗主動，因為工作環境同氣氛同以前好唔同，我自己都要適應。其實我唔 mind，花無百日紅，你點比較啫，但只要做好自己想做嘅嘢，人哋會尊重，我都會覺得有價值。」
辛勞為餬口

種種迹象，說明了關淑怡貫徹我行我素，她曾經走在時代尖端，形象前衞百變，她卻自評為冇形象：「我做番自己之嘛，鍾意着乜嘢衫就着乜嘢衫，鍾意扮靚就扮靚，係唔化妝出嚟嚇你就嚇你。不過隨住年紀長大，自己會豁出去多啲，你會開心啲，咁辛苦做嘢為乜嘢呢？咪又係為生活，為開心啲之嘛，呢樣先係人生嘅基本需要。」

攝影：葉君海
場地：亮明居
化妝： Wendy Lee
髮型： Calvin Chan of QG PRIVATEi SALON
服裝： Stella McCartney


關淑怡揚言樂於做未婚媽媽，故拒絕囝囝經手人對她母子提供金錢上的任何照顧。

曾經做過樂壇天后的關淑怡，今時今日已不介意紅與不紅。

關淑怡澄清曾志偉絕非兒子父親，笑謂傳聞令她嗌救命。　(資料圖片)

關淑怡聲稱至今為止，其7歲兒子從未問過生父身份。　(資料圖片)

2009.05.22 關淑怡交代囝囝生父之謎

[東方日報]

樂壇天后關淑怡自05年復出後，隨之而來的是一大堆關於她囝囝生父的傳言，由喇嘛、加拿大商人以至近期熱炒的曾志偉。最近她接受訪問，表示當初她選擇只生 BB而不結婚，是因為自覺不適合當太太，但假如日後囝囝問到生父的問題，她一定坦白相告。

記＝記者　關＝關淑怡

記：成日傳曾志偉係你個仔嘅生父，見到佢會唔會尷尬？
關：我同志偉傾番呢件事得啖笑，望吓（我個仔）都知唔係啦，佢都未見過我個仔，我係因為阿倫先識志偉，阿倫係睇住我大，志偉係我世叔伯。
記：有冇打算公開生父身份平息謠言？
關：記者都叫我公開就唔使煩，但要諗下小朋友角度，佢都需要尊重，唔可以因為媽咪是公眾人物，就隨便寫啲不負責任嘅嘢，我要保護佢，佢有權過自己生活，（囝囝被追訪有冇受困擾？）佢嘻嘻哈哈就算數，佢性格好樂天，我希望保持番佢嘅童真，畀佢過佢要過嘅生活。

感情等待真愛
記：佢從來無問過？或者同學問佢？
關：佢從來冇問過冇提過，（呢方面）睇到佢懂唔懂事，如果佢第日要問，我一定會講畀佢知，佢有權知，一切順其自然。
記：如果你一日唔講，傳媒都圍繞住囝囝生父做話題？
關：呢件事講唔講對我冇分別，其實個仔已經七歲，件事已經過咗，唔需要再提，畀我過番一個新生活得啩，唔好因為呢個男人煩我。
記：咁想唔想再拍拖或生BB？
關：唔係唔想，我唔係係人都可以拍拖，好少男人令我有心動感覺，同一個人相處係冇得預計，可能做呢行見過太多靚仔，唔會抗拒亦唔會好渴望，感情係最冇得保證嘅，真係要相處落先知。


樂壇今非昔比
記：05年復出至今四年，感覺點樣？
關：好唔同，整個娛樂圈嘅運作、人事、市場、音樂都好唔同，（慣唔慣？）唔慣，好似我好唔想解釋，但要我不停講嘢解釋，依家啲人講嘢多過做嘢。
記：影響你做音樂？
關：係有影響，佢哋要我唱番以前啲歌，但我覺得要look forward，但身邊嘅人要我做番以前啲嘢，我會包容，但唔想被定型。
記：音樂上你想做乜嘢？
關：當然想做新嘢，但唱片公司市場導向就想我去翻唱、要求我做卡拉OK歌，我認為歌手要去嘗試，自問我嘅空間未見底，但需要有人support，我想做新一代都聽嘅歌，現在嘅歌迷都唔聽本地音樂，我覺得唱片公司好大責任，哈！咁講唔知會唔會冇人簽我！
記：咁多負面新聞，其實最介意係乜嘢？
關：喺BMG嗰時講我失蹤，我好介意好介意，我冇做過，以前本住清者自清，但原來冇呢樣嘢，我好失望，特別係話我喺黃耀明演唱會失蹤，從來都冇呢件事。


性格繼續堅持
記：呢四年做咗乜嘢音樂最令你自豪？
關：就係嚟緊呢隻碟，全部歌都有plug過，好抵聽，哈哈，（記者就覺得與李香琴合作嘅《三千年前》最為驚喜）。同琴姐合作個化學作用好好，早前見到琴姐，佢都話好多人讚賞，呢樣嘢係天時地利人和。
記：你曾經自認麻煩、任性，到今時今日依然仲係？
關：我可以話唔係咩？哈哈！係與唔係，每個人諗法都唔同，我對自己嘅睇法都唔同，（你執着？）執着與堅持只係一線之差，執着係情緒上，堅持係原則上，（你是堅持還是執着？）我想我係堅持，我唔會吹毛求疵，我會放手，我需要寧靜生活，我嘅小朋友都需要，大家生活都係為咗愉快，唔使有權有勢，有錢亦唔一定開心，（你愉唔愉快？）我愉快，做人應該安分，所以我安分，好滿足簡單生活。
硬啃死貓嘲似懷孕
關淑怡自言成日食死貓，無論係緋聞或者關於工作的是非，她懂得自嘲：「我食咗唔少（死貓）啦，你睇下食到我個肚腩，個個都笑我有身孕，好想搵次講：『呢個係我個仔送畀我嘅最大禮物，生完仔都有嘅，佢太愛我啦，呢個係自然美！』對於與囝囝生父目前無聯絡，但不知以後會怎樣，一如她掛在嘴邊，感情是無法預計的。

關淑怡不會對囝囝隱瞞生父是誰。

關淑怡深明感情無法預計，順其自然活得更開心。

雖然經常被屈，但關淑怡已懂得如何面對。

再戰樂壇的關淑怡不想因循依舊，希望能在音樂上創新。

2009.05.21 曾志偉關淑怡大方攬

[壹周刊#1002]

都話我係清白㗎啦！（設計對白）
關淑怡強調志偉係佢世叔伯，希望大家放過佢，仔仔老豆另有其人喎！

上個禮拜二512四川大地震一周年，無綫搞咗個特備節目《TVB512再展關懷》向災民送暖。

當晚嘉賓陣容分別有陳奕迅、楊千嬅、譚詠麟、李克勤等，不過全場焦點，始終係緋聞情人曾志偉、關淑怡。

投懷
關淑怡採取主動，埋去攬實「世叔伯」志偉，之後兩個傾到唔知時間過，要工作人員提示上台做closing。

聯同Stephy、Juno合唱《憑着愛》嘅薛凱琪（左），叫工作人員舉大字報「提水」，但係佢嘅獨門拼音唔係人人睇得明，例如第一行「人生2再沒Foo」，即係「人生已再沒苦惱」，高高低低就譯做「GoDai」。

經常high爆嘅陳奕迅，彩排時同苗僑偉玩到癲晒，之後又無端端拖住N年前緋聞女友楊千嬅。近排已經傳同謝安琪「相逢恨晚」，Eason係咪想測試老婆嘅忍耐力呢？

疑似關淑怡仔仔生父嘅志偉，當晚負責做司儀，同專登嚟唱歌為災民打氣嘅關淑怡，其實本來無機會埋身接觸，趁阿倫同克勤上台唱歌，關淑怡主動埋去同企响一邊休息嘅志偉攬吓打招呼，非常大方。

擺明清白，攬吓俾記者影無所謂，關淑怡仲出口術，兜個圈話志偉老。「志偉係我世叔伯，我個仔未見過佢，阿倫、克勤就見過。」照關淑怡咁講，計落佢個仔有機會見志偉，應該要嗌對方公公。

撰文︰八珍

2009.05.18 曾志偉見關淑怡子要拍照留念

[明報]

關淑怡親口澄清曾志偉不是其子之父，昨日志偉出席活動時談及此事，他說：「傳了那麼多年都習慣，但每次有此傳聞，關淑怡都會打電話給我講對不起，不好思意，搞到我。我真的覺得沒所謂，反而覺得好搞笑，連二女也忍不住打趣問家姐寶儀，問點解有個8歲的弟弟也懵然不知？」

志偉未見過關淑怡的兒子，笑言有日見到要影張相留念。志偉說：「最慘是個小朋友，在學校會被人取笑，笑他是獎門人個仔，現在終於都真相大白。」那他見過小孩的父親沒有？志偉說沒有，接着更打趣地說：「可能8年後，關淑怡說個仔是志偉的。」問會否跟關淑怡的兒子上契？他承認有考慮過，但不想在這麼敏感的時候上契。

---

志偉捱義氣無辜做老竇
[東方日報]

曾志偉與阿Sa昨日出席活動，對於最近關淑怡開腔澄清志偉並非其兒子生父，含冤多年的志偉表示關淑怡曾多次致電向他道歉，並稱：「冇所謂啦！食咗咁多年死貓，麻木咗喇，做老友預咗，日久知真相。冇見過佢囝囝，如果真係佢爸爸，八年都冇見過，真係幾狠心！」有指關淑怡兒子長相與志偉恍如餅印，志偉笑言：「我二女仲send電郵畀我大女，問幾時多咗個八歲嘅細佬都唔知？」他表示望與疑似囝囝見面，並揚言一定會抱着對方影相留念。

---

曾志偉恨抱關淑怡兒子
[太陽報]

近年屢傳關淑怡兒子是曾志偉的私生子，昨日志偉宣傳舞台劇時表示，連二女兒亦Email問家姐孰真孰假！他笑言希望與關淑怡的兒子見面，並抱着他合照，但由於太敏感，暫無意與他上契。

---

志偉食死貓
[蘋果日報]

提到關淑怡否認兒子是志偉骨肉，志偉說：「食咁多年死貓都麻木啦，我二女都問我大女，點解有個 8歲細佬都唔知。見過又唔傳，未見過就傳咁耐，佢（關淑怡）每次都打畀我，話幫我澄清好唔好，我話唔使啦，點知就傳足咁多年。」問到可知經手人是誰，他故弄玄虛說：「 8年後可能佢會講其實個仔真係志偉嘅。」

---

食死貓多年終真相大白 曾志偉考慮與關淑怡愛子上契
[文匯報]

曾志偉被傳是關淑怡(Shirley)七歲大兒子的親生父，直至早前Shirley首度開腔正式否認其事，志偉獲Shirley大平反，他笑言對傳聞感到麻木，相信最慘是小朋友，可能被同學取笑是掌門人的兒子，如今終於真相大白。

傳聞太真連女兒都信

　對被誤會是Shirley兒子父親多年，他表示沒有所謂，早已麻木，做得老友都預了，便抱平常心對待，他說：「路遙知馬力，日久知真相，大家現在知道便最好，最神奇是傳聞講到真的一樣，我二女電郵問我大女，幾時有個八歲細佬都唔知，Shirley因事件已打過好幾次電話給我講對不起，又提議出來幫我澄清，自己覺得無需要，只會越描越黑，件事遲早會水落石出，沒料到傳足幾年。(有無興趣見Shirley的兒子？) 有，到時要攬住佢影張相，其實我沒見過她兒子。(相反阿倫和克勤見過？)見過又唔傳，未見過就俾人傳，我這老豆都算唔盡責，八年都唔見個仔，好狠心，哈哈。(Shirley話傳言的來源是因你當年要坐佢車引起?) 那次她上掌門人不識路去電視城，所以我坐佢車，點知有狗仔隊跟縱，之後便認定我是爸爸，真的好笑，(係咪你風流先俾人傳?)唔知係咪，最慘是小朋友返學俾人笑係掌門人個仔，現在七年之後，終於真相大白。(知否真正的爸爸是誰?)唔知，也不會問對方。(索性跟其子上契?)考慮過，但這敏感時期不宜去做。」

2009.05.16 解說與曾志偉緋聞 關淑怡：他沒見過我兒子

[明報周刊 #2114期] 

每隔一段時間，Shirley便有新聞，平日不作回應的她，今次破例出來解畫。

2009.05.15 關淑怡兒子 沒追問身世

[明報]

【明報專訊】關淑怡昨日宣傳新歌《地盡頭》，早前有報道指其兒子貌似曾志偉，似有所暗示，她笑說：「我個仔靚好多，又幾高！」她表示志偉有個健康家庭，希望雜誌能放過他。

關淑怡表示早在2002已有傳她與志偉同居，但當時兩人只是同車，其兒子亦未見過志偉。至於兒子有否問生父是誰？關淑怡說：「沒有，可能我身兼父職做得好。」

---

關淑怡笑志偉食死貓
[太陽報]

關淑怡昨日接受電台訪問，對於兒子經常被指貌似曾志偉，外界更盛傳志偉是「經手人」，她解釋：「我生完仔冇幾耐上畄《獎門人》做嘉賓，碹晚志偉話想試我手車，點知畀狗仔隊影畄相，志偉呢隻死貓啃畄好耐！」

她再否認志偉是兒子父親：「冇可能！我個仔靚仔咁多，佢依家到我下巴都算高，我唔係話志偉矮，志偉話傳我同佢搞到佢唔使見人，我話搞到我唔使嫁人就真！」她揚言兒子從不過問父親是誰，若將來兒子問及，她亦樂意告知。

關淑怡笑言與志偉傳緋聞，搞到她「唔使嫁人」！

---

關淑怡唱《地盡頭》不加意見
[成報]

　　關淑怡昨日接受商台訪問宣傳新歌《地盡頭》，內容描述一個女仔愛到盡頭的故事。問到現實中的她是否這樣，她指演繹歌曲內容未必是代表她的愛情觀。她稱新碟內容全由公司去安排，她只是負責唱，就算拍MV也不會給意見，避免再被人說她是麻煩的人。問她是否很介意被冠上麻煩二字，她說：「我唔介意，係女人都麻煩架啦。麻煩唔緊要，有幽默感就得，我好有幽默感的。」

　　早前有報道指關淑怡的兒子跟曾志偉很相似，她笑道：「我個仔靚好多。」她指兒子一點也不像志偉，唯一是身高較像，因為他的身高已到她的下巴。問她會否公開兒子爸爸身份為志偉闢謠，她笑道：「咁不如叫我搵個新男友。」她指這是自己的私隱，只有兒子才有資格知道，但兒子從來都沒有問過她。她稱當初生BB時也預料會惹來揣測，但女人生仔是正常的事。至於志偉與她的兒子是否很熟絡，她說：「佢地都無見過面，反而阿倫、克勤就見過我個仔。」

---

關淑怡爆曾志偉「啃死貓」多年
[on.cc]

【on.cc專訊】 關淑怡（Shirley）的兒子經常被指貌似曾志偉，外界更盛傳志偉便是「經手人」，Shirley到電台接受訪問時，自爆志偉「啃死貓」經過，她說：「當年我生完仔冇幾耐，上去《獎門人》做嘉賓，當晚志偉話想試我手車，點知我畀狗仔隊跟仲影埋相，所以志偉呢隻死貓啃了好耐！」Shirley亦再次否認志偉是兒子父親，她笑言：「冇可能，我個仔靚仔咁多，佢依家到我下巴，都算高，但我唔係話志偉矮，志偉話傳我同佢搞到佢唔使見人，我話搞到我唔使嫁人就真！」Shirley揚言兒子從未追問過自己父親是誰，但當有日他追問起，自己亦會告知，因兒子最有資格知道父親是誰。

2009.04.30 蟬過別枝遇阻 基仔改口風翻兜金牌

[蘋果日報]

古巨基和金牌大風續約問題一直拉鋸之中，有傳因他採拖字訣兼私下和其他公司斟洽，結果激嬲公司拒絕再傾。前晚基仔在紅館舉行尾場演唱會，有消息指他和其他公司談不攏，難怪他在慶功宴上發功向金牌揸弗人黃柏高大送秋波，賣口乖表示續約首選必是舊公司。

已和金牌大風約滿的古巨基，前晚在紅館演出最後一場演唱會，當晚捧場的有 o靚模諸葛梓岐和 Neway二太子男友薛嘉麟、吳家樂和老婆周蕙蕙、鄭欣宜男友 Mark、吳雨霏和 HotCha等。

關淑怡（ Shirley）穿上性感 bra top上台為基仔做嘉賓，不過卻露出小肚腩及有條橫紋，有點殺風景，但她依然一臉自信大扭特扭，基仔卻很怕醜不敢正望 Shirley。當基仔講秘密另一半時，觀眾大叫古太，但他詐儍扮聽不到，直至多謝工作人員時終開口感謝緋聞助手女友 Lorriane， fans即拍手，基仔笑言：「滿意啦。」完騷後觀眾不肯離開，基仔現身笑稱：「你哋唔使返工咩？你哋唔返工點儲錢睇下次。」最後基仔以一曲《勁歌金曲》完場。

事後基仔出席慶功宴，但 Lorriane卻未有現身，金牌大風揸弗人黃柏高（ Paco）與基仔合照，但表現生疏，未有埋身密斟。問到基仔續約問題考慮如何？他說：「過埋今晚先，大佬呀，啱啱先做完演唱會，我想癲吓吃喝玩樂，瞓醒先傾。」再追問睡醒和誰人傾？基仔即大賣口乖說：「瞓醒先算，我唔會睇之前啲傳聞，第一個會搵 Paco先，不過心中未有數。」基仔坦認有和其他公司接觸，但有消息指他和其他公司談不攏，難怪即時轉軚再向舊公司施冧功。
講到 fans很接受 Lorriane，基仔笑說可能她的 fans比自己還多，至於不單一多謝她會否令她不開心？基仔只說因為要感謝的人太多，他表示是否公開身邊另一半則一切看緣份。

嘉賓關淑怡穿上 bra top又唱又扭，基仔全程不敢正視。

2009.04.30 關淑怡笑談經手人

[壹周刊#999]

有關於關淑怡七歲大仔仔關浚賢生父誰屬？最近再次成為話題，無頭公案，曾志偉唯有繼續成為嫌疑「經手人」。

上個禮拜五（廿四日），關淑怡現身手錶活動，盛裝打扮又保持笑容，睇嚟心情唔錯，但大會工作人員就無佢咁輕鬆，一早吩咐記者唔好發問私人問題。

俾記者追問仔仔生父身份，著住五吋高踭鞋嘅關淑怡依然保持笑容，只係工作人員急於帶佢走。

面對記者，關淑怡淡淡定，影相期間，有人趁混亂追問曾志偉係咪賢仔生父，佢都冇黑面，仲面帶笑容話：「冇可能，冇可能。」之後就由工作人員帶走。

其實賢仔生父身份，除咗曾志偉，名嘴、商人甚至喇嘛都上榜，今次關淑怡講明唔關志偉事，不過呢個「老豆」都好難甩身，點解？佢最多人識囉！