2014.06.11 歌迷衝上台 淡忘兒子生父 關淑怡遇狂迷示愛 Face 周刊 368期

fit爆 Shirley在後台心情輕鬆又玩得，呢個 pose係佢自己話扮緊千頌伊喎！

歌迷衝上台　淡忘兒子生父　關淑怡遇狂迷示愛

揭盅一個收埋 12年嘅兒子生父秘密，原來可以如同放下心頭大石，鬆一口氣，關淑怡就係最佳人辦。

上月尾（ 28日），Shirley飛往多倫多登台，在自爆兒子生父身份後首次現身，唔只容光煥發，仲有佬狂追，關淑怡仲喺後台扮千頌伊隊啡，識玩識笑仲識煲韓劇，係咪好耐未見過咁開心嘅關淑怡呢？

適逢出道 25週年，47歲關淑怡今年動作多多，雖然傳聞中的 25週年紀念演唱會尚在籌備中，不過已經落實下月會演出寶麗金「Come Back」演唱會新加坡站及張耀榮紀念演唱會，亦密密接海外登台，全線回歸舞台。

加拿大場館不如紅館保安嚴密，竟然被一位年約五十熟男衝上台獻花又示愛，難得 Shirley保持鎮定，只擾攘咗 3分鐘。

適逢入行 25週年，有加拿大粉絲送上 home made 25週年蛋糕， Shirley話好感動。

多倫多賣大包

今年三月在社交網絡自爆兒子生父身份，關淑怡接受訪問時冷淡回應：「忘記他」

上月 28日，關淑怡獲邀飛往多倫多，在 Rama Casino Toronto開騷獻唱。全場爆滿，入場觀眾首首識跟住唱，性感大露背又騷胸的關淑怡愈唱愈 high，點知差唔多完騷，一位年約 50歲男歌迷失驚無神衝上台，又送花又示愛，一輪嘴講「 I Love You」唔肯落台！好在狂迷又得把口，硬企 3分鐘敵不過台下觀眾狂噓落台， Shirley一啲都冇蝕底俾人！

據知情人士透露，爆出兒子生父的新聞過後，關淑怡反而輕鬆唔少，積極接 Job，更識享受生活，仲學人煲韓劇《來自星星的你》添。莫非多倫多華僑唔啱心水，要同外星人先溝通到？

25變26

狀態大勇，關淑怡除了落實會演出下月舉行的寶麗金「 Come Back」群星演唱會新加坡站外，更會出席八月舉行的兩場張耀榮慈善紀念演唱會，原訂會大搞的 25週年個人巡迴演唱會，卻因為今年紅館爆期申請不果。據悉，執意今年要開騷慶祝入行 25週年，關淑怡大有可能在明年 3月後，在紅館以外的其他場館完成心願， 25週年隨時變 26週年。

下月 19日的寶麗金群星演唱會新加坡站，宣傳海報上，關淑怡擺到正中間好顯眼。

88年已經在日本推出日文細碟，關淑怡的首張廣東專輯《冬戀》在 89年 3月出版，至今剛好25年。