[東方日報]
本報接到讀者來電報料，指關淑怡自淡出樂壇後，一直靠積蓄過活，坐食山崩下，要放盤出售跑馬地住宅之餘，更欠租車公司十六萬，及欠友人萬幾元代交手提電話費，連關父也被銀行追數云云。該讀者又指關淑怡離開寶麗金後，九六年尾EEI曾出千八萬斟她，之後環球唱片出千一萬斟她四年出八隻碟，及後告吹，到去年十月EMI出四百萬斟她。至現在她的身價狂跌，英皇只肯出二百萬簽她兩年出兩隻碟。
由於該讀者言之鑿鑿，本報為求真相，曾嘗試聯絡關淑怡了解，卻沒法找到她，遂向出租保母車公司的負責人馬仔求證，他說：「冇十六萬咁多，只係一萬幾千，好小事。（欠幾耐？有冇追數？）大半年，追做乜？我一直有聯絡，以後仲有合作。」繼證實關淑怡確有欠租車錢後，本報更找到收數公司向她追討共一萬一千多元的手提電話費文件，證實了她的欠債傳聞。
至於關淑怡身價狂跌之事，本報找到過去年半來一直幫關淑怡同唱片公司傾約的黃浩（英文名Kenny，于莉表弟）了解，原來二人合作失和，Kenny更大罵關淑怡反骨、過橋抽板。Kenny忿忿不平說：「佢屈我爆料俾報紙知佢同英皇傾約，佢話一定話俾人知係我爆，即係唱我係二五仔，佢唔同我講道理，心理唔正常，諗埋一邊。我呢年幾次幫佢傾約，不但冇收過錢，仲俾佢一連搵三次笨，佢想飛起我，又話我唔係鬼佬，唔夠專業，我俾佢搞幾鑊，我好驚，唔再幫佢，費事阻人發達。
屢斟唱片公司不果
「第一次係幫佢傾EEI，當時已經有人叫我小心，話佢隨時飛起我，後來EEI同EMI分家，不了了之；EEIM.D.過環球唱片，打俾我挖關淑怡，出價千一萬四年八隻碟，關淑怡話改三年六隻，環球還價八百幾萬，但佢唔睬，話一千萬都冇，搞到好尷尬，結果環球最大鬼佬話關淑怡出爾反爾，唔肯簽佢，我幫佢補鑊，鬼佬話考慮，但鄭東漢話關淑怡冇得做，唔簽。之後我仲同佢傾過華納、上華、EMI，但都冇人肯簽佢，話信佢唔過，以前成日玩失蹤、唔錄音、唔做宣傳。依家佢又搵我，但我唔會再睬佢。」
No comments:
Post a Comment