[壹周刊#841]
今年二月，關淑怡舉行了一連三場「關於我」演唱會。雖然票房慘淡，但由於口碑好，主辦單位Music Nation負責人李進，即時宣布會為演唱會開PartII，更得張耀榮讓出六月原本屬於汪明荃的演唱會檔期，大開直通車。
不過，即使連PartII廣告都賣埋，演唱會最終都係爛尾收場。全因關淑怡將歌酬坐地起價，由原本四十萬變成六十萬，令近年演唱會蝕多過賺的張耀榮，即刻謝晒，縮沙唔搞。
拉上補下
二月廿五日，關淑怡在尾場演唱會上三度encore，觀眾依然情緒高漲，即使晒場館燈都唔肯走，為票房唔掂的關淑怡個唱，挽回口碑。
叫好唔好座，難得搞手之一，Music Nation負責人李進一樣無有怕，更在慶功宴上宣布加場。
「演唱會咁好反應，我好有信心，已經計劃開PartII！」
事實上，二月的三場演唱會，由於只賣出四成門票，再扣除其餘開支，合共蝕近二百萬。但若能承接開PartII，沿用所有舞台、燈光及服裝製作，拉上補下，不失為反蝕為賺的好方法。
而同一時間，原本打算今年六月開演唱會的汪明荃，見明年入行四十周年，故把個唱延至○七年舉行，令四出撲期的李進，最後獲張耀榮讓出六月份的檔期，順利地為關淑怡再開三場演唱會，張耀榮亦能分一杯羹。
坐地起價
不過眼見個唱口碑係威係勢，向來我行我素的關淑怡，竟然再次發作。據知洽商初期，關淑怡已經帶埋律師到場，要求全新製作，連歌衫亦一件不留，大大加重製作成本。除了製作上要求多多，關淑怡亦扭計加歌酬，加幅達百分之五十，由四十萬跳至六十萬一場。
獅子開大口，近年演唱會蝕入肉的張耀榮，便極度不滿，不斷向其他搞手狂呻。「乜都話要改，歌酬仲加咁多，你估賺硬咩！大不了咪唔搞！」
激嬲張耀榮，另一搞手李進亦顯得非常無奈，而關淑怡亦企硬唔減價，寧願唔做都唔肯讓步。
師奶生活
本週一（十七日）下午二時，關淑怡帶住四歲兒子，在愉景灣的沙灘遊樂場遊玩。大部分時間，乖仔都由菲傭陪玩，阿媽只顧住企埋一邊煲煙，極之悠閒。
卸下歌衫，關淑怡亦儼如小師奶，其間不時與身邊師奶們吹水，更心情靚絕幫其中一個長髮師奶紮辮。
玩足一粒鐘，兒子由菲傭先湊回家，關淑怡則與三個師奶，四人行齊齊坐哥爾夫球車到友人寓所，至傍晚亦未見回家。
本週二（十八日）下午六時，關淑怡離開愉景灣，約了友人到尖沙咀海港城逛街，之後再到酒店飲茶。看來享受自由自在生活的關淑怡，根本唔心急再開演唱會。
就關淑怡六月PartII演唱會告吹一事，向李進求證，他又一貫作風大耍太極。「都無話段時間搞，係張生想佢做，我唔急，最緊要做好，傾好晒先！」（係咪因為Shirley加價，張生唔做？）「呢個現實問題，明解，合理就得！」
至於張耀榮，則由秘書擋駕，以工作為由不作回應。
容祖兒Soler唔賣
近年，演唱會已經唔再大賣十幾廿場，投資者亦喜歡開兩、三場小試牛刀，見反應好，才決定加場。最佳例子有新人側田，才出了一隻碟，演唱會便由一場爆到三場；實力派陶亦爆足三場；而出道幾十年，首次開演唱會的劉家昌就更犀利，三場演唱會門券一日掃清，即刻宣布加場。
不過，亦有估佢唔到例子，好似樂壇一姐容祖兒，同管弦樂團合作的四場演唱會，除了一百五十元門券賣晒，其他貴價飛仲有大把；還有賣樣賣創作的Soler兄弟，即使開一場，只有三成門券公開發售，一樣賣唔晒。
No comments:
Post a Comment