[原文]
之前有優先預購關淑怡演唱會飛，問勻身邊同事朋友家人個個都話唔得閒，卒之無入場睇；本著在乎天長地久多過曾經擁有的本人趁出了碟當然買返屋企欣賞，可以永遠擁有嘛。
之前睇人家的blog已知是次演唱會song list由新至舊，頭三首《進化論》、《帶我去跳舞》和《關於我》是新歌，無買到新碟的關係只識得有派上台plug的《關於我》。現場應該有好多人和我一 樣只識《關於我》所以唱頭幾首時觀眾反應不太大，細聽之下又唔錯喎，有點後寶記年代迷迷幻幻的影子。林一峰出場合唱了一首《非愛不可》之後回憶快車開動啦，《雲上舞》(呢首我唔識)開始慢慢時光倒流到第一首派台歌《叛逆漢子》，歌越舊越有感情越多回憶，越看亦越投入，縱然只得我一條友係個廳度一路睇一路跟住唱；《難得有情人》萬人大合唱全場一萬幾人同我都好似搵返自己的青蔥歲月咁，歌曲編排真係有心思。每首歌唱之前仲會出一出唱片封套個樣，原來當年我都問同學借過當中好幾隻來聽。
好多睇歌名唔識的歌聽了頭幾句就有印象，原來細個時聽聽埋埋唔少。如讀書時覺得唔知佢唱咩的《Dela》(唔 知點解覺得係同草蜢的《嗲噢》係一pair的)和《梵音》(聽親都不禁想起王菲的《浮躁》)；快歌《製造迷夢》和《逝世的傳奇》；梁詠琳在歡樂今宵(應該係)改成《假的酒菜》的《假的戀愛》(被《假的酒菜》影響咗對呢首歌的觀感，原裝正版係首哀莫大於心死的慘情歌)；甜到漏的《當世界無玫瑰》、《患難見真情》；舊時去K必唱的《人生可有知己》和《繾綣星光下》(唔係呢隻歌都唔識呢兩隻字)；數數吓，真係唔識無印象的只有《仍是那麼深愛你》。
出道初期關淑怡的歌k味都幾濃，到90年代中期開始嘗試新曲風。曾經有位同學說過關淑怡的風格在王菲出現前是獨一無二，在王菲學成回港歌路越來越個人化後關淑怡開始刻意求變(未知可否叫急起直追？)，最後走進死胡同云云。關淑怡給我的第一印象係很型，對她的認識始於92年姨姨將她的《Montage》大碟 (應該係一隻精選碟)和郭富城《請把我的情感帶回家》錄在同一餅卡式帶上(又係帶﹗)，當年極度沉迷郭先生歌聲的本人日聽夜聽煲到滾瓜爛熟，當中一大堆快歌如《夜迷宮》、《血色瑪莉》、《黑豹》、《叛逆漢子》真係型到不得了。最近環記不停翻出寶記經典大碟包括這張，一看次下慢歌也相當厲害：《愛恨纏綿》(《回到未嫁時》主題曲，死未﹗當年好仲意睇海味的說﹗)、《冬戀》、《患難見真情》、《這是我心裡對白》、《星空下的戀人》(其實係中板作品)，還有成名作《難得有情人》 和勁hit的《明天你是否依然愛我》，沒理由唔比呢$49蚊帶堆童年回憶返屋企。是次concert大部份都有唱，如果可以唱埋《這是我心裡對白》和《最深刻一次》就好了。
數數手指，上年的草蜢，新年的李克勤，之後的關淑怡加上前陣子的周慧敏，好強的寶麗金陣容；除了周慧敏的一個外，其餘三個我都捧場了(當然分入紅館睇和買碟睇啦)。不知他們有否興趣組個《熱力節拍wu bu ba》班底再開多次？可以加埋湯寶如和劉小慧就更perfect了。看一看名字，全部都係80年代末90年代頭出道的一輩，他們開concert總有我們 這一群入場聽歌搵番自己童年/少年回憶；十年二十年後，現在二字頭當打的歌手又有多少個有這等叫座力？總不能廿年後仲叫左麟右李出呢唱架﹗
No comments:
Post a Comment