[娛壹]
連po關淑怡舊片 求出山做嘉賓「再會」望見片蒲頭︰再唔係買個鑼打鑼揾佢，萬九幾人掛字佢！
下月中在西九文化區舉行兩場演唱會的 #林敏驄，邀請多位歌手演出，包括老友鄭中基。早前他在社交平台po了對上一次2017年演唱會綵排片段，片中為《再會》練歌，唱得非常動聽的 #關淑怡(Shirley)，網民聽後高呼要她重出江湖做嘉賓，阿驄回網民︰「仲刮緊。」唔少網民都話等阿驄好消息，期待她live的演出。
昨日林敏驄再出po尋關淑怡，他揀了一條2017年對方為金像獎表演綵排，與他互動的花絮舊片做餌，希望「失蹤」多時的關淑怡，見片蒲頭。娛壹致電林敏驄，問他成功聯絡關淑怡沒有，他說︰「仲係刮緊。」阿驄曾為關淑怡填過不少作品，除《再會》，還有《梵音》等，故他好想關淑怡為他出山做嘉賓。
2019年，關淑怡與Aga(江海迦)一同到美國登台，之後甚少公開演出。2020年她更在Instagram表示不再信任唱片公司，發表多篇英文文章宣佈退出樂壇。近年又搬離住了多年的愉景灣，許多圈中人與她失聯。
距離演唱會還有大半個月，林敏驄稱繼續盡全力「刮」關淑怡，他笑言︰「我哋好想『再會』」佢，請見字蒲頭，萬人要佢蒲頭。」如果關淑怡仍冇聲氣，有否下一步行動，林敏驄搞笑話要發最後通牒︰「再唔係買個鑼，打鑼揾佢，萬九幾人掛字佢！」
關淑怡未應機！惟有重溫日前阿驄放出的金像獎綵排舊片段，片中他與Shirley的互動搞笑連場。
圈中能夠制衡蘇格蘭場臭口驄，只有鄭中基同曾志偉，其餘99.9%都成為任其魚肉的對象。當日開live，阿驄影住一位樂手吹長管，之後Shirley「自殺式」入鏡，阿驄說︰「Shirley幾時搵條咁長嘅嘢返嚟！」雖然她即用手掩住林敏驄把口，但仍冇法制上他亂噏︰「跳落海都勾得住浸唔死。」
Shirley主動問他︰「人哋問你，我情緒係咪有問題？」她以為林敏驄會講好說話？阿驄答︰「冇問題呀！行得走得，有咩問題？係都係精神有問題，睇佢個樣就知。」Shirley反擊︰「有問題都唔及你。」林敏驄一啖屎一啖沙糖︰「我係話你好精神呀。」在阿驄身邊，Shirley變得一樣好玩得。
之後阿驄說︰「曾志偉個x街，贏咁多錢都唔俾啲人使！正x樣」在旁的關淑怡怪他︰「你亂講嘢，唔怪得曾志偉憎我憎到死啦。」Shirley未講完，阿驄玩埋另一單，指向遠方︰「咦，寧波車嚟咗喎！」再冇法招架的Shirley只能大笑。
之後他走到坐在一角的導演莊文強身邊問︰「鄭中基個x仔，去咗邊？」此時Shirley再入鏡，莊文強好心提醒她︰「佢開緊live呀，小心阿Shirley。」但她說︰「我唔驚佢開live。」結果阿驄又玩過︰「你小心因住又跌落海。」Shirley聽罷，拍打他的頭，但越打把口越唔收︰「跌落個臭海，跌咗落海漲咗。」
兩個玩完一輪，之後Shirley祝阿驄2017年演唱會大賣，又感激為她的作品填上動人的歌詞。在林敏驄作品中，關淑怡亦是一塊重要拼圖，希望今次她見片蒲頭，再一次以《梵音》震懾觀眾。
No comments:
Post a Comment