有關關淑怡，印象只限於十多年來從報章雜誌累積回來的道聽途說。於是，一落實訪問，第一時間打給與她合作過的造型師：「幫佢借衫係唔係好麻煩？」趕到現場，又害怕她遲到失場、或者鬧情緒。心情一直七上八落、戰戰兢兢。
事實證明，人云亦云，實在不智。造型師說女主角有禮又合作，訪問當天一連排了五家傳媒，輪到本刊時已經接近黃昏，關淑怡沒有一點不耐煩和禮數不周，換好單薄的衣服、對着大廈玻璃幕牆隨便補了補妝，就聽從指示站在食正風的戶外頂樓餐廳擺起甫士。大風吹來，頭髮亂了、衣角揚起，她也一點沒抱怨，輕輕用手撥開黑髮，嘴角揚起淺淺一笑。
廿零歲女都下下花我個幾鐘專訪時間補粉， 46歲的關淑怡卻望兩眼落地玻璃就能上場拍照；八十後歌星仔聲嘶力竭只會讓人覺得嘈雜，關淑怡輕描淡寫的〈陀飛輪〉，卻聽到很多人含住泡眼淚，這是甚麼道理？
關淑怡叫我別把事情想得太複雜：「做人同唱歌都係一個道理，諗得太多，就唔會唱得好。」
三言•兩語
孤寂、神化、失常、失場，甚至早前在社交網絡的疑似尋死傾向，關淑怡的做法一向是，你有你講、我有我保持沉默。直到一年前落實明年二月的兩場紅館個唱，好友兼經理人 Marriane有心鋪排連串訪問和宣傳，想讓關淑怡自己開腔改變公眾印象。關淑怡聽話開腔了，卻說沒有奢望能改變甚麼。
「公眾人物都係人、都有經歷，係唔係三言兩語、幾份報道就被人理解呢？我唔會奢求人哋明白我。咁多年，個個都叫我出嚟解釋，話唔解釋，人哋就會當真……言論自由，唔係你問我答咁簡單，了解一個人，唔係一個訪問三言兩語就講得清。你哋呢行點運作，我諗你清楚過我。言論自由，傳媒想點寫都得，但唔代表你哋寫咗我，我就一定要答喎。我選擇唔出聲，都係言論自由嘅一種啫。」
02年產子後，關淑怡一共復出三次舉辦演唱會，其他時間一概唔見人，以及被失場失常傳聞包圍。我一坐下來就問，一整天做訪問、內容重複再重複，一定不習慣吧。關淑怡答道：「點會唔慣？咪同以前一樣！」看來又是我想多了，出道 26年，娛樂圈的運行規則，關淑怡怎麼會不明白。經理人 Marriane也解釋，大多數的失場指控，都是有中間人看準關淑怡低調不愛解釋的個性有心抹黑：「我嘅事業係我咁多年努力建立，我又點會自己再一手一腳摧毀佢呢？呢個圈唔係一個人運作，失場唔係我想失就可以失，外間睇我睇得好負面，其實我真係唔係一個咁負面嘅人。」
86年出道、 90年代攀至事業高峰， 2001年，關淑怡突然因為懷孕與唱片公司解約、從樂壇消失。因此一直有報道指關淑怡的兒子浚賢現年 11歲，關淑怡表示是誤傳：「佢十歲。」據說，這次開唱全力配合宣傳，亦是因為兒子長大，關淑怡不再覺得有必要爭取時間陪在兒子身邊。「好多人問我點解留喺香港，原因其實好簡單，我屋企人全部都喺香港。我平時都同一個普通人一樣，係人哋個媽咪、係人哋個女。想煮時都可以煮幾味……雖然姐姐煮多，但係你問我，我梗係話我煮得更好味。」關淑怡說，對於兒子的期望不大，只想他可以舒舒服服做自己，以及兩母子之間沒有秘密，兒子的身世，對外界是秘密、在家裏則不是：「我覺得適合嘅時候，會講晒畀佢聽。人有唔同階段，冇可能由細到大用一套方法同佢溝通，唔會 work……佢會唔會問（有關爹哋）？……佢又未有呢樣嘢，我諗佢知嘅，佢知道感情事唔係一個人話事，好多嘢都可以影響一段關係，唔係兩個人想一齊就可以一齊。我唔係太依賴個仔，我亦知道佢遲早會長大，會有鍾意嘅人出現，我淨係想佢大個任何嘢都可以同我分享。其實好難，我都唔係嗰種咩都同父母分享嘅女。不過，至少父母唔會擔心我，認識我嘅人，都知道我識得知足、識得照顧自己。懂關淑怡嘅人知道，我雖然唔叻 social、唔叻講嘢，但係我識得照顧自己，我唔係廿幾歲，知自己追求啲乜。」
我不•寂寞
46歲的單親媽媽，追求的是？關淑怡說，並不是一個伴。初出道時，在寶麗金年代與李克勤傳過緋聞， 02年未婚產子，有說孩子生父是她在加拿大認識的圈外人。近十年，則周不時傳出被曾志偉特別照顧。關淑怡說， 02年以後，一直單身。「呢十年，我都係一個人，身邊啲人成日笑我，話我唔出街，機會都會低啲……」我問她有覺得寂寞的時候嗎，一直細細聲慢條斯理的關淑怡提高聲量，用單字回答：「冇！」我再想舉例說明，總遇過觸動神經的場景吧，關淑怡不等我說完，再答一次：「我知你講乜嘢，冇！工作已經日日要見咁多人，點會寂寞？私底下，最好唔好嘈我，畀我一個人好啦！知足常樂，你要覺得夠至得，就好似一杯水，唔好淨係見到冇幾多，應該睇吓你擁有幾多。我廿幾歲已經知，每個人都係一個個體，唔好對別人、唔好對一段關係，存在過多幻想。一個知足常樂嘅人，唔會覺得寂寞，唔應該覺得寂寞，人，真係唔可以太貪……」
My life is ok
回想過去 46載人生，關淑怡說，女孩子，每個階段都美好，每個階段都值得回憶：「 My life is ok，除咗，十幾年前冇搵個人去結婚。雖然我冇遇到一個可以結婚嘅人，但我唔比人哋特別，都始終會想要一個家。一個豐盛嘅人生，應該係有事業有家庭、結過婚生過仔，樣樣都經歷吓。冇遇到嗰個可以結婚嘅人，老土啲講，係緣分。」
看着眼前的關淑怡， 46歲，沒有隨身帶鏡沒有厚粉似批盪； 20年如一日，帶着不太白不太整齊的爆牙唱歌開騷，沒有像所有人一樣走去換膚植牙玩漂白；被人抹黑，從來不會報警申寃開記招；迷倒眾生的，僅僅靠聲音，這個圈，還有人能比關淑怡更特別嗎？
No comments:
Post a Comment